Директор и наставник на скопска гимназија осомничени за издавање лажни свидетелства и диплома
Секторот за внатрешни работи во Куманово поднесе кривична пријава против В.Д. (35) и Ш.З. (38) поради постоење основи на сомнение за сторено кривично дело злоупотреба на службената положба и овластувањето и против О.С. (50) од Старо Нагоричане поради постоење основи на сомнение за сторено продолжено кривично дело употреба на исправа со невистинита содржина.
Првопријавениот, како одговорен наставник за вонредни ученици во средното училиште „Цветан Димов“ од Скопје, и второпријавениот, како директор во училиштето, и покрај тоа што знаеле дека третопријавениот не бил запишан како вонреден ученик во 2012 и 2013 година, туку бил запишан на точно неутврден датум во 2014 година, како и дека третопријавениот не ги полагал сите испити по предметите, своерачно, со потписи и печат му изготвиле и издале четири лажни свидетелства и диплома за положен завршен испит, информираат од МВР.
Оттаму велат дека третопријавениот ги употребил овие документи како доказ во правниот сообраќај во повеќе наврати, како и при засновање работен однос на неопределено време на работното место командир на територијалната противпожарна единица во општина Старо Нагоричане, за што во период од две години му биле исплатени 34 месечни бруто-плати во точно неутврден износ, за кој износ го оштетил буџетот на Република Македонија.
