ВМРО-ДПМНЕ ќе избира нови членови на Извршниот комитет
ВМРО-ДПМНЕ вечер се очекува да одржи седница на Централниот комитет на партијата, на која треба да се избираат нови членови на Извршниот комитет.
Извршниот комитет е политичко-извршен орган на Централниот комитет на ВМРО-ДПМНЕ, чиј број се утврдува со одлука за негов избор. Со работата на Извршниот комитет координираат претседателот и потпретседателите на партијата. Нема информација за тоа колкумина од засега се уште актуелните триесетина членови на ИК, ќе останат во неговиот состав.
Како што информираат од ВМРО-ДПМНЕ, пренесува МИА, на седницата се очекува да се дискутира и за актуелната политичка состојба
Интересот на јавноста е насочен кон овој настан, бидејќи кадровскиот избор ќе биде првиот сигнал за политиката на новиот претседател.
„Од старите членови на ИК, таму сигурно ќе останат Александар Николоски и Влатко Ѓорчев. Можно е во ИК да влезе поранешниот министер за финансии, Трајко Славевски, а се шпекулира дека член ќе биде и Игор Јанушев, претходниот директор на ЈСП ‘Скопје’, па дури и дека е можно да биде Генерален секретар на партијата. Ние, од ‘пониските ешалони’ не сме прашани за ништо, информациите ги добиваме од оние кои биле повикани на разговор“, велат извори од партијата.
