Група поддржувачи на огранокот на Мултиетничкиот синдикат на образованието (МЕСО) од Македонска Каменица, спротивно на Законот, утринава постави блокада на патот што води кон рудникот САСА, при што автобусот што ги превезува работниците од првата смена во рудникот бил спречен да дојде до рудникот, со што работниците им беше оневозможено да стигнат на своите работни места, обвинуваат од САСА.
„Во моментов рудникот САСА функционира нормално, но доколку ваквата незаконска блокада продолжи, ќе биде доведена во прашање натамошната работа, што ќе предивика големи штети и за компанијата и за сите нејзини 700 вработени. За целата ситуација се информирани надлежните државни органи од кои согласно нивните законски надлежности е побарано да преземат мерки за целосна деблокада на патот кон рудникот“ се наведува во соопштнието на САСА.
Од таму велат дека согласно одредбите од Законот за работни односи, протестот организиран од локалниот огранок на МЕСО е незаконски.
„Рудникот САСА досега имаше одлична соработка со вработените и нивниот легитимен синдикат које е дел од СИЕР – Синдикатот на индустријата, енергетиката и рударството, за што доказ се досегашните постигнати резултати во безбедноста при работа, платите кои се двојно поголеми од просечните плати во земјата и вложувањата во нова технолија и подобри услови за работа. Според Законот, менаџментот на рудникот е обврзан да разговара и соработува со оној синдикат кој во законска процедура докажал дека ги претставува вработените. Тоа досега беше синдикатот на рударите при СИЕР. Секој друг синдикат, за да може да преговара, согласно Законот за работни односи, е обврзан да го докаже истото“ се додава во соопштението.
Досега, како што велат од рудникот САСА, и покрај барањата од страна на компанијата, новиот огранок на МЕСО нема доставено до рудникот ниту еден формален доказ дека е репрезентативен синдикат во САСА.
Според компанијата, пред да се започне со штрaјк или протест, двата синдикати треба да состават заеднички тим за преговори со менаџментот и да отпочнат процес на медијација. Ниту еден од овие законски одредби досега не е исполнет, што го спречува менаџментот на компанијата да постапува, обвинуваат од САСА
