Средба Заев – Ципрас на 17 мај во СофијаСе планира, а доколку не се случи нешто непредвидено, на 17 мај во Софија ќе се одржи тет-а-тет средба меѓу Зоран Заев и Алексис Ципрас, на маргините на Самитот ЕУ -Западен Балкан, објави грчкиот информативен портал „Њуз247“.
На средбата меѓу двајцата премиери се очекува да се побара постигнување конечен договор во прашањето за решавање на „македонскиот проблем“. Дипломатски извори за „Њуз247“ потенцираат дека и покрај тешкотиите што постојат, постигнат е важен напредок и договор во поголемиот дел од темите во преговорите, и покрај тоа што останува главната разлика за употребата на името ерга омнес, пишува порталот и додава дека Заев и Ципрас имаат „отворена телефонска линија, иако разговорите и контактите не се објавуваат.
Новинарот на порталот коментира дека 11 и 12 мај се особено важни за развојот на настаните, со оглед на тоа дека во петок, во рамки на конференцијата во Сунио, веројатно Димитров и Коѕијас ќе остварат нова билатерална средба, додека пак за сабота е закажан состанок со медијаторот Нимиц, јавува дописничката на МИА од Атина,
„Нимиц, се чини, е решен поодлучно да притисне за постигнување решение“, пишува порталот.
