Министерот за информатичко општество и администрација Дамјан Манчевски оствари работна средба со министерот за јавна администрација на Естонија, Јанек Маги.
На состанокот разговараа за процесот на дигитализација на Естонија и позитивните искуства кои можат да бидат пренесени во Македонија. Во тој контекст двајцата министри разговараа за можноста Македонија и Естонија да потпишат меморандум за соработка.
Како што истакна министерот Манчевски, експертизата која што ја поседува Естонија, може да послужи како пример и мотив за посветеност и реализација на зацртаните цели за дигитализација на Македонија. Како што подвлече министерот Маги, можноста за соработка на ИКТ компаниите во двете земји, инвестирањето во иновативни проекти и стартапи во Македонија е отворена. На овој начин ќе се придонесе кон економски развој на земјата, зголемување на просечната плата, а на подолг рок и задржување на младите во Македонија.
Како што заклучи министерот Манчевски, МИОА и Владата работат на тоа Македонија по примерот на Естонија да биде следната ИКТ дестинација во Европа.
Состанокот се одржа во рамки на меѓународната конференција за отворено владино партнерство, во Тбилиси, Грузија.
