Од мали нозе не учат дека мораме да водиме сметка за себеси – да се храниме правилно, порано да одиме на спиење, да вежбаме, да внесуваме витамини и минерали. Меѓутоа, некои од овие таканаречени „здрави навики“, всушност се само мит.
Додатоци во исхраната – витамини
Во понудата постојат голем број на витамински препарати, кои, наводно не штитат од настинка и не прават поздрави и повитални. Всушност, витамините служат за регулирање на процесите во нашето тело и за стимулирање на одредени хормони. Советот на докторите е да се води сметка и да не се внесуваат премногу додатоци во исхраната, бидејќи на тој начин тие можат да бидат контрапродуктивни за организмот.
Жолтиот шеќер е поздрав од белиот
Станува збор за уште една заблуда, бидејќи жолтиот шеќер е ист како и белиот. Единствена разлика е тоа што жолтиот шеќер содржи густа течност со темна боја. Главната заблуда лежи во тоа што многумина сметаат дека тој е поздрав, бидејќи не е сладок како белиот.
На секого му се потребни осум часа сон
Експертите веќе со години полемизираат на оваа тема. Заклучено е дека недостатокот на сон и физичка активност, негативно влијаат на здравјето на поединецот, но на некои луѓе едноставно им се доволни шест часа сон, додека на некои нема да им биде доволно ниту ако спијат по девет часа. Секоја индивидуа си има поинаков животен ритам и навики.
Антибиотикот ги убива вирусите
Ако имате грип за време на зимската сезона, тогаш докторот веројатно ќе ве испрати дома, со совет да внесувате што повеќе течности и да одмарате, без антибиотици. Антибиотикот не се дава бидејќи тој не ги убива вирусите, како што е грипот во случајов, туку тој се препишува само ако станува збор за воспаление или бактерија.
Алкохолот ги уништува мозочните клетки
Никој не препорачува консумација на алкохолни пијалаци, освен чашка вино за ручек, но експертите докажаа дека е мит мислењето за тоа дека алкохолот уништува мозочни клетки. Тој влијае на метаболичките процеси и прекумерната доза може да доведе до недостаток на кислород во организмот, што доведува до проблеми поврзани со клетките во мозокот, но дефинитивно не ги уништува.
