Загрозениот сведок ќе сведочи што видел при упадот во Собранието
Во Кривичниот суд во Скопје денеска ќе се одржи ново рочиште за предметот кој се однесува на случувањата во Собранието на 27 април лани и според најавеното, исказ треба да даде последниот сведок предложен од обвинителството. Станува збор за единствениот загрозен сведок во овој судски процес, чиј идентитет не ѝ е познат на јавноста.
На претходните рочишта се сослушаа 36 сведоци предложени од обвинителството, меѓу кои беа и премиерот Зоран Заев, неколку министри и пратеници. Во судница можеа да се слушнат и сведочењата на вработени во собраниските служби, обезбедувањето, полицајци, повиски функционери во МВР, новинарка, како и еден осуден за обидот за убиство на Зијадин Села токму на „крвавиот четврток“.
На обвинителна клупа за делото терористичко загрозување на уставниот поредок и безбедноста на држава седат 33 лица, од кои две се теретат за помагање, меѓу нив се и пет актуелни пратеници од опозицијата, организаторите на протестите „За заедничка Македонија“, функционери од МВР итн. Обвинети се:Љубен Арнаудов, Сашо Василевски, Крсто Мукоски, Љупчо Димовски, Јохан Тарчуловски, Митко Чавков, Митко Пешовски, Душко Лазаров, Горан Јошевски-Леви, Оливер Поповски, Оливер Радулов, Сашко Марковски, Мунир Пепиќ, Абдуљфета Алими, Елена Доцевска-Божиновска, Иван Цветановски, Борис Дамовски, Богдан Илиевски-Бетмен, Владо Јовановски, Игор Дурловски, Стефан Младеновски, Михаил Младеновски, Захарие Симовски, Младен Додевски, Јане Ченто, Горанче Ангеловски, Игор Југ, Илија Славески, Влатко Трајков, Вилијам Михајловски, Никола Митревски-Кољо, Александар Василевски-Нинџа и Митре Питроповски.
Сите пред судот на почетокот на овој судски процес се изјаснија дека не се чувствуваат виновни за делото кое им се става на товар.
