Кризниот штаб против промена на Уставот, распуштање на Собранието и распишување избори „Македонија-блокира“ и Координативното тело на дијаспората во Европа денеска поднесоа писма до пратеничките групи на СДСМ и ВМРО-ДПМНЕ зошто не треба да ги гласаат уставните измени.
„Денеска во име на Кризниот штаб ‘Македонија блокира’, во кој членуваат 84 организации, и Координативното тело на дијаспората во Европа поднесуваме до пратеничките групи на СДСМ и ВМРО-ДПМНЕ писма во кои ги даваме причините зошто не треба да учествуваат во злосторството спрема македонскиот народ и македонската држава. Ние сме убедени дека пратенциите ќе го слушнат гласот на македонскиот народ и ја гледаат еуфоријата што владее во земјата против промена на Уставот, оти ако помине ова, Македонците се бришат од светската мапа на нации. Има време пратениците да се вразумат, веруваме дека имале само лош ден кога гласале за одлуката за пристапување кон измена на Уставот, а сега до нас допираат информации и дека биле под силни закани и уцени. Ги повикуваме да издржаат, патем, и нам не ни е лесно, нè следат, прислушкуваат, нè повикуваат во полиција, но набргу ќе се менуваат работите, на пролет имаме претседателски избори, исто така, на пролет ќе има избори и за Европскиот парламент и овие белосветски битанги од типот на Хан, Могерини ќе си заминат оти и во ЕУ владее општа еуфорија во која доаѓаат десните партии. Затоа, пратениците на СДСМ и ВМРО-ДПМНЕ да бидат на страната на македонскиот народ“ рече Јанко Бачев.
„Како претставник на 36 организации од Австралија во ‘Македонија блокира’ сакам да го изнесам ставот на нашинците од Австралија. Ние сме против промена на Уставот и ги повикуваме пратениците да размислат што ќе се случи доколку го сменат Уставот. Не ја признаваме оваа нелегитимна власт што е донесена и насадена од странски фактори и мешетари кои се мешаат во нашите внатрешни работи иако според меѓународните конвенции не сметаат да го прават тоа. Ние ги подржуваме македонските организации кои се борат да прекинат овие собраниски дебати, да се закажат нови избори и да дојдат нови политички сили кои ѝ мислат добро на Македонија“ – рече Кире Јовчески од Австралиско-македонскиот совет во Австралија.
