Јас ги почитувам мерките за претпазливост, не постои никаква причина да се преиначат, изјави ексминистерката за внатрешни работи, Гордана Јанкулоска, пред денешното рочиште за случајот „Титаник“ на СЈО, а откако кривичниот суд им определи 30-дневен притвор на поранешниот министер за транспорт и врски, Миле Јанакиески и поранешниот генерален секретар на Владата, Кирил Божиновски.
„Нема причина да ми се одреди притвор“, рече Јанкулоска која е осудена на на 6 години затвор во случајот „Тенк“ на специјалното јавно обвинителство за злоупотреба на службената положба, односно за спорната набавка на „мерцедесот“ од 600 000 евра.
Јанкулоска поднесе жалба за првостепената пресуда до Апелацискиот суд, од каде што сè уште нема одлука.
Кривичниот суд соопшти дека рано изутринава Јанакиески и Божиновски биле притворени, поради опасност од бегство. Ваквата постапка следи откако вчера експремиерот Никола Груевски, по кого е распишана меѓународна потерница, објави на „Фејсбук“ дека се наоѓа во Будимпешта каде побарал политички азил. Груевски во истиот случај „Тенк“ е осуден на 2 години затвор.
