Покрај обвиненијата за случаите „Таргет-Тврдина“ и „Империја“, Сашо Мијалков е обвинет и во предметите „Титаник 2“ за изборни нерегуларности, „Тортура“ за начинот на кој бил уапсен лидерот на Обединети за Македонија, Љубе Бошкоски и случајот „Трезор“ кој се однесува на злоупотреба на средства од Буџетот на РМ во висина од 862 илјади евра.
Во јавноста се шпекулира дека за поранешниот директор на УБК подоцна ќе се бара притвор за најновиот предмет на СЈО, „Империја“ за кој досега е притворен бизнисменот Орце Камчев како и сопственикот на „Пелистерка“, Цветан Панделески заедно со уште тројца соработници кои се поврзуваат фирмите на Камчев.
Сашо Мијалков од вчера вечер е во истражниот затвор „Скопје“ во Шуто Оризари по одлука на Основниот суд Скопје 1 Скопје, а по барањето на Специјалното јавно обвинителство. Како што дознава Макфакс, во решението на кривичниот суд за притворот на ексдиректорот на тајната полиција, за случајот „Таргет-Тврдина“ стои дека мерката му е определена поради опасност од бегство. Специјалното јавно обвинителство во барањето за притвор навело дека за обвинетиот имаат оперативни информации дека презема дејствија и активности со кои планира да се даде во бегство. Во решението на советот, сепак, не е наведено на кои околности СЈО ја темели ваквата претпоставка.
Засега СЈО не побарало да му биде замрзнат имотот на ексдиректорот на тајната полиција, со оглед на тоа што во решението за притвор за предметот „Таргет-Тврдина“, пишува дека правни и физички лица кои се поврзани со Сашо Мијалков поседуваат над 8 милиони евра имот.
Адвокатот на Сашо Мијалков, Антонио Апостолски денеска изјави дека ќе биде упатена жалба по одлуката на судот за одредување мерка притвор на обвинетиот. Тој исто така уште вчера потенцираше дека е недозволиво да се одреди мерка притвор без претходно да биде сослушан обвинетиот.
