Јирген Клоп беше полн со комплименти за неговиот напаѓач Садио Мане, тврдејќи дека тој е еден од играчите кои секој клуб во Европа би го посакал во своите редови. Сега Клоп може да воздивне, бидејќи Мане се согласи да потпише продолжување на договорот со Ливерпул.
Садио Мане го продолжи договорот со Ливерпул на дополнителни пет години и се обврза за соработка со клубот до 2023 година.
Со новиот договор Сенегалецот ќе заработува 150.000 фунти неделно, што е скоро двојно зголемување во однос на неговиот претходен договор. Новиот договор е награда за одличната форма на 26-годишниот Мане, кој во 89 натпревари за Ливерпул постигна 40 гола и беше прогласен за Играч на годината уште во првата сезона во клубот.
„Многу сум среќен што го продолжив договорот со Ливерпул. Ова е одличен ден за мене и се радувам што можам да му помогнам на клубот да стигне до нови успеси“, изјави тој.
Минатата сезона Мане беше клучен дел од тимот на Ливерпул кој стигна до финалето на Лигата на шампионите, а неговиот тренер Јирген Клоп вели дека оваа сезона целта е освојување на барем еден трофеј.
