На клиниката за ортопедија денес беа отворени три нови хируршки сали. Директорот на клиниката Виктор Камнар за 24 инфо вели дека Клиниката за ортопедски болести е една од најстарите здравствени институции во државата. Воедно таа е и најголема организација која се бави со лекување на сите ортопедски болести, повреди и состојби.
–Најголема и по просторни капацитети, материјални и штое е најважно човечки и стручни капацитети. Да не заборавиме дека тоа е и универзитетска клиника која едуцира и продуцира кадри во дејноста и е единствена од тој тип во Р Македонија. Имајќи го сето горенаведено во предвид нормално е и да трпела трансформации во тој период и различни реконструкции и распределби. Последната голема реконструкција била 1995 година кога е реновиран и изграден новиот хируршки блок- вели Камнар. Според него оперативниот блок во моментот е еден од најмодерните во државата.
-Ги исполнува сите потребни светски стандарди во однос на целата инфраструктура, од контрола на течението на воздухот со негативен притисок до најмодерни оперативни столови и осветлување. Тоа директно значи дека во сите операциони сали може да се изведуваат сите типови на интервенции без ограничување. Тоа значи зголемена безбедност и сигурност за пациентите , како и намалување на времето на чекање за интервенција бидејќи е овозможена поголема ефикасност во работата. Реновирањето траеше околу 9 месеци. За време на тој период беа изведувани и градежни зафати покрај сите други внатрешни инфраструктурни реконструкции- вели Камнар. 
Валентина Ангеловска
фото: Слободан Ѓуриќ
