Европската левица (ЕЛ) ги избра своите водечки кандидати за изборите за Европскиот Парламент во мај, јави дописничката на МИА од Брисел.
Станува збор за Виолета Томиќ од словенечката партија Левица и белгискиот синдикалец Нико Ки, кои ќе влезат во трката за претседател на Европската Комисија.
Европската левица е формација на радикалните левичарски партии во ЕУ. Во Брисел овој викенд се одржа состанокот на нивниот Извршен одбор, на кој беа избрани двајцата кандидати.
Томиќ моментно е пратеничка во словенечкиот Парламент, член на Парламентарното собрание на Советот на Европа и активист за Палестина и за правата на ЛГБТ заедницата.
Ки е генерален секретар на белгискиот синдикат на работниците од челичната индустрија и познат синдикалец во Белгија и во Европа.
Иако не е меѓу најбројните европски политички партии, Европската левица има една значајна партија членка, грчката владејачка Коалиција на радикалната левица (Сириза), додека францускиот Лев форнт (ФГ) на Жан Лик Меланшон е нејзин партнер.
Томиќ за сега е единствената жена од Источна Европа која е вклучена во трката за претседателската функција во ЕК.
– Со овие двајца кандидати сакаме да му дадеме јасна понуда на народот во Европа, затоа што сме на страната на тие кои не ја прифаќаат растечката контрадикција меѓу богатството и сироштијата, соопшти партијата по изборот на кандидатите.
Изборната платформа на Европската левица предвидува редистрибуција на богатствата, антимилтаризам и одржлива животна средина.
– Новото младинско движење против климатските промени и за соочување со последиците од погрешните политички одлуки за следната генерација, за нас преставува централна точка, соопшти Европската левица.
