Екипата на Реал Мадрид го совлада Ајакс на „Јохан Кројф Арената“ во првиот натпревар од осминафиналето од Лигата на шампионите.
„Кралевите“ славеа тесна победа од 2:1 во натпревар во кој ќе треба што побрзо да го заборават првото полувреме.
Сепак, во вторите 45 минути избраниците на Солари го кренаа нивото на игра, а токму говорот кој го одржал аргентинскиот стратег на паузата бил главната причина што фудбалерите заиграле далеку подобро во второто полувреме.
– Им дозволуваме да си поигруваат со нас. Не смее да го правиме тоа. Има моменти кога вака играме со намера, но вечерва мора да „загриземе“. Мора да напредуваме и секој индивидуално мора да оди напред и да се држи за тимот, како што прават тие. Со две кратки комбинации, ќе создадеме простор кој ќе ни донесе многу можности – истакнал Солари.
Овој разговор ги мотивирал играчите кои во вториот дел заиграа многу подобро и со погодоците на Бензема и Лукас Васкез ја обезбедија посакуваната победа.
