Не знам дали мојот син е жив, дали јаде, дали спие, дали му е ладно…Ова не е живот. Како јас да живеам, а да не знам каде е, како е и што прави моето дете. Веќе трет месец го нема, а полицијата не го ни бара. Се сомневам на две момчиња и сигурна сум дека тие се вмешани во неговото исчезнување.
Ова за 24 Инфо го вели Маја Трпковска, мајката на 26-годишниот Пинета Секондо, кој исчезна вечерта на 10 декември во Скопје. Таа наредниот ден веднаш го пријавила случајот во полицијата и апелираше на социјалните мрежи. До сега од полиција нема никаква информација за Пинета, ниту за автомобилот што го возел, „шкода“ со таблички SK-1566-AP.
Дента пред да исчезне, Пино со радост ја очекувал мајка си и помалиот брат да пристигнат од Италија.
-Наредното утро со помалиот син со автомобил дојдовме од Италија за да го земеме кучето. Пино и татко му веќе имаа купено авионски карти за 23 декември за да дојдат во Италија за Божиќ, а јас со помалиот син и кучето со автомобилот да се вратиме назад. Кога стасав сабајлето, сопругот, кој беше дома, видел дека го нема Пино, му ѕвонеше на службениот и на приватниот мобилен телефон. На почетокот телефоните звонеа, тоа беше 6.42 часот. Во 7 часот и двата мобилни наеднаш беа недостапни. Значи некој ги исклучил двата телефони наеднаш, бидејќи не може истовремено да се исклучат. Сопругот ми кажа дека Пино заминал кај пријателката Ангела во населбата Ѓорче Петров и дека ќе се врати брзо. Пино секогаш кажува каде оди, се јавува ако задоцни или ако преспие некаде. Сопругот замина на работа, а јас почнав да се јавувам по болниците да прашам да не имало некаде сообраќајка, да не му се има нешто случено. Кога се врати сопругот отидовме во полициска станица да пријавиме, иако ни рекоа дека треба да поминат 24 часа. Но јас си го знам детето, никогаш не оди никаде без да каже. И вечерта рекол дека ќе се врати брзо, вели Маја.
Таа е револтирана од македонската полиција, која според неа, ништо не превзема за пронаоѓање на нејзиниот син. Се сомнева дека во исчезнувањето на нејзниот син се вмешани две момчиња од Скопје. Едниот е син на сопственик на познат ресторан во скопската населба Аеродром. Според неа, во прашање е понуда од 200.000 евра за тендер, најдена во компјутерот на нејзиниот син. Пино е вработен во италијанска фирма која учествува во изградба на автопатот за Бугарија.
-Откако случајот е пријавен во полиција до сега се сменија четворица инспектори. Истата вечер кога пријавивме првиот инспектор ми се јави и на висок тон ми рече „со кое право вие пријавувате за исчезнато лице, тој е возрасен, зошто да го пријавувате за исчезнат“. Бев фрапирана. Утредента отидов во полиција, го пријавив и побарав случајот да го води друг инспектор. Откако пријавив, 15 дена потрошив да ги убедувам дека мојот син не е пијаница, не е коцкар, не се дрогира. Мене инспекторите ми викаа „син ти е пијаница“. Го викнаа и мојот сопруг во полиција и го убедуваа во истото. Ако е така моето дете немаше да вози и да патува секој ден во Ранковце каде што му е работата. Тоа се 70 км пат до таму и 70 назад. Син ми освен едно кафе на ден, ако е тоа порок, ништо друго не конзумирал, се сеќава Маја.
Во меѓувреме, другарите почнале да го бараат, по кафулињата каде што излегува, барале по улици… На крај дошле во ресторанот каде што Пино често одел.
-Всушност, Пино од летото почна да се дружи со синот на сопственикот на ресторанот и со уште едно дете, но тие не му беа вистински пријатели. Кога другарите влеге во ресторанот, не дошол синот на газдата, туку другото момче и ги прашало „што се дошле овде? И Македонија да ја превртите Пино нема да го најдете. Ако сакате нешто да дознаете мене треба да ме прашате“. По ова децата си заминале и дојдоа мене да ми кажат. Веднаш им кажав на инспекторите. По два-три дена истото момче дошло кај еден од другарите на Пино и му покажал СМС порака на телефонот и кажал дека пораката се разменува меѓу познаниците на Пино, но детево не успеало да ја прочита цела. Наводно пишувало „Ќе видиш сега за 3-4 дена ќе го најдат Пино претепан, зашто Пино нешто ветил, а тоа што го ветил не го исполнил“. Веднаш ја известив полицијата за ова по што случајот го презедоа инспектори од Оодделението за насилен криминал. По ова полицијата веднаш повика на информативен разговор група од десетина деца каде меѓу кои се вртела пораката. Од сите тие што се испрашани, во полицијата останаа тој што му се правеше другар и синот на газадата на ресторанот, како најсомнителни-вели мајката.
Во меѓувреме Маја ангажирала хакери на кои им го дала комјутерот на Пино. Тие ги провериле неговите профили на социјалните мрежи, а успеале да го лоцираат и неговиот мобилен телефон пред да се исклучи. Тие во компјутерот нашле понуди за набавка на работни машини во вредност од 200.000 евра.
-Во компјутерот најдовме понуди направени од страна на синот на газдата на ресторанот. Полицијата ги стави нив двајца на полиграф и веднаш по испрашувањето ги пушти. Не знам дали ги прашале за фирмата, за понудите, но полицијата мене тоа не ми го кажува. Затоа повторувам, не знам што прашања им поставиле, но по ова полицијата како да престана да работи на случајот и не прави ништо, револтирана е мајката.
Таа вели дека со полицијата последен пат се слушнала пред две недели.
-Последен пат и се јавив на инспекторката и ја прашав дали ја провериле банкарската сметка на Пино, дали во меѓувреме некој вадел пари од сметката. Ми рече дека ја провериле во декември, а сега е февруари. Како може да не проверуваат? Или, пак, не се способни да работат. Јас не можам да ги затворам банкарските сметки на син ми бидејќи е полнолетен. Јас ниту броевите што се вртени од неговиот приватен телефон не можам да ги дознаам. Броевите од службениот можам бидејќи тој број се води на име на фирмата. Девојката Ангела ме пријави во полиција бидејќи сум и досаѓала на телефон. Па нормално дека ќе ја барам, јас си го барам детето. Она нон стоп истото го вели, се виделе, стоеле пред зграда кај нејзе и Пино и рекол „уморен сум и ќе си одам дома“. Значи од местото ние каде што живееме, да стасаш до Ѓорче Петров има 30 километри и по 15 минути веднаш да си заминеш од таму. Според мене, таа го има измамено син ми за да дојде итно кај неа. Ние не ја познавме девојката. Единствен што знаеше каде е Пино и со која девојка отишол да се види е еден од тие двајца што му се правеа пријатели. Таа го има излажано да оди во Ѓорче, вели Маја.
Според неа, последен пат Пино е снимен на камерата што е на излезот од Скопје, кај клучката за обиколницата во Сарај каде што завртел за да си оди дома.
-Таму е снимен во 22.40 минути. Ни кажаа дека приватниот телефон утрото кога звонел татко му во 6.42 бил лоциран на клучката Арачиново-Стајковци-Ченто. Работата е што таму сигналот го фаќа и Инџиково, каде живее едно од двете сомнителни момчиња. Кога ни ја кажаа локацијата со другарите на Пино го пребарувавме теренот, ендеците… Јас го кажав ова на полицијата, но ништо од нив, никаква соработка. Ниту Ангела не е викната на полиграф, а зошто, не знам. Само ми кажаа дека ја испрашале и толку, а таа е единствена што не е викната на полиграф. За полицијата доволно било тоа што го кажала во исказот. Не е доволно тоа што го кажала. Мене самите полицајци ми кажа дека Анегла веќе имала криминално досие во полиција. А единствени од сите другари што ја познаваа е братучетка му на Пино и еден од тие двајцата што му се правеа другари, вели Маја.
Таа објаснува дека Пино во фирмата влегол како преведувач бидејќи знаел италијански, македонски, англиски и романски јазик. Кога виделе дека добро работи го унапредиле и го ставиле да работи логистика.
– Практично правеше понуди за помали набавки- за вода, апарати, хартија за принтер. Прв пат направил вака голема понуда. Синот на газдата ја измислил оваа понуда. Како може тие две деца, од кои едниот работи кај татко му, а другиот се уште учи да имаат толку пари за машини. Најдобриот другар на Пино и внука ми мѝ кажаа дека син ми им кажал дека не се само тие двајца и дека зади нив имало некој поголем, но не смеел да им каже кој е тој. Тој ги имал машините или парите, зашто на понудата пишувало ако одлучи фирмата да земе од нив, тие за пет дена ќе ги донесат машините. Значи тој некој ги имал веќе на лагер машините. Полицијата ништо не направи. Амбасадата на Италија во Македонија многу ни помага во овие тешки моменти. И тие се сомничат дека зад исезнувањето на Пино стојат тие двајца. Копиите од понудата ја имам, а ја има и полицијата. Симптоматично е што понудите од другите фирми се професионално подготвени. Големи фирми кои конкурирале на тендерот со портфолио, деловни телефони, веб адреси и адреса на фирмата. А сомнителната понуда има само меил адреса со име и презиме од газдата на ресторанот и еден мобилен телефон, вели Маја.
А телефонот што стоел на понудата го користел синот на сопственикот на ресторанот. Сепак, Маја го напишала бројот на Гугл и дознала дека некое трето лице на Фејсбук огласува продажба на мобилни телефони. Во меѓувреме, се што било огласувано во 2018 година од тој број било избришано. Сепак, кога инспекторите дошле во ресторанот утврдиле дека синот на сопстеникот има телефон со истиот број. Тој се правдал дека купил мобилен од огласувачот, кој од тогаш го употребувал истиот број.
-Сигурна сум дека они директно или тој што е позади нив кој што има машини го имаат киднапирале Пино за да го исплашат два, три дена за да го одржи ветувањето, они мислеле дека ќе го добијат тендерот. Но Пино не е тој што одлучува, тоа е огромна фирма, Пино е само вработен тамо и нема никаква моќ да одлучува, одлучуваат директорите. Но никој не знаеше дека јас ќе дојдам. Можеби мислеле таткото не разбира македонски, сам не може ништо да направи ни да го бара, ќе го исплашиме два, три дена и ќе го пуштиме. Но јас истиот ден направив хаос и по полиција и по Фејсбук. Другарите секаде го бараа и мислам дека се исплашиле. Се надевам дека го чуваат некаде врзан, дека моето дете не е убиено, очајна е мајката.
Таа секаде бара помош, од видовити луѓе до криминалци. Била и кај локалниот бос во Чаир.
– Тој ми кажа дека не се замешани во оваа работа. „Да е е некој од моите или пак колата да е во моја зона ќе знам, мува да прелета ќе знам зошто прелетала“. Бев и кај уште еден, и тој ми се колнеше во деца дека нема врска. Барам помош и кај некои видовите луѓе, во земјава, но и во странство. До сега ми велеа дека е жив, но сега ме разочараа. Нема место во Скопје каде немам отидено, нема места кај што бев, а за кои ниту полицијата не знае дека постојат. Имам отидено во некои напуштени стари воени објекти, магацини кои се полни со делови од украдени коли, има колку сакаш. Сето тоа го имам фотографирано, скапи коли, браниците, ветробранските стакла, се тоа што не можат да го употребат. Нема место каде немам отидено. Накај Нерези има напуштени куќи и таму се сум поминала, очајна е Маја.
Таа е разочарана од полицијата, но и од медиумите.
-Инспекторите од потраги по исчезнати никогаш не ми се јавиле. Се сретнав еднаш со нив и толку. Ги испрашаа луѓето што го познаваат Пино, другарите. По два месеци дошле кај едно девојче, другарка на Пино, во 21 часот навечер да ја испрашуваат. Таа кога ми се јави плачеше на телефон, ја испрашувале и цело време со сила ја убедувале да каже дека Пино имал пороци и дека треба така да каже. Јас им давам индикации за овие двајца, а тие отишле да плашат девојче од 19 години. Зошто полицијата не работи? Каква полиција е ова? Јас им се јавувам да кажам дека имам информации за моето дете, а они не ми одговараат на телефон. „Работиме“ што работат? Цела Македонија да ја копаа до сега ќе ја ископаа. А во Скопје веќе дојдоа веќе неколку новинарски екипи од Италија да пишуваат за случајот и тие правеа свое истражување. Од друга страна, ниту еден медиум овде не сака да ме контактира. Што барам јас освен помош да се најде моето дете, завршува Маја.
Даниела Вељановска
