Петре Шилегов нема намера да се откаже од труењето на скопјани, истакна денеска на прес-конференција Димче Арсовски од ВМРО-ДПМНЕ, кој зборуваше околу наводите дека сомнителен бизнисмен од Хрватска ќе го пресели опасниот бизнис со отровен отпад од странство, во Македонија.
„Петре Шилегов се уште не одговори дали нов партнер на градот во бизнисот со рециклажа на опасен отпад ќе биде лицето Петар Припуз кој е криминално гонет во Хрватска. Шилегов не кажува дали Припуз кој е сопственик на ЦИОС и уште други десетина компании, ќе го пресели опасниот бизнис со најотровниот отпад од странство во Македонија и ќе ги труе граѓаните на Скопје“, обвини партискиот портпарол.
Арсовски посочи дека Припуз е човек кој во Хрватска е гонет заедно со загребскиот градоначалник, Милан Бандиќ, за сериозни криминали.
„Партнерот на Шилегов се товари дека затаил над 13 милиони евра данок, со тоа што издавал фиктивни фактури на фирми кои што требало да му бидат добавувачи и никогаш не се утврдило дали навистина бил купен отпадот од негова страна односно дали физички стигнал до неговите фирми“, кажа портпаролот на ВМРО-ДПМНЕ.
Тој јавно запраша дали намерите на Припуз и Шилегов се да го преселат бизнисот на ЦИОС во Скопје и да реализираат сомнителни бизниси и порача дека сомнителната зделка не смее да се реализира.
