Кинеските власти уапсија од 2014 година речиси 13.000 „терористи” во оддалечената западна провинција Ксинџијанг, објавено е денес во подолги полициски упатства во кои се бранат контроверзните државни мерки за исламска дерадикализација.
Кина се соочува со сè поголеми меѓународни критики поради воспоставување објекти кои Обединетите нации ги опишуваат како прифатни центри во кои има повеќе од еден милион Ујгури и други муслимани. Пекинг вели дека се неопходни мерки за да се спречи заканата од исламската милитантност, и своите центри ги нарекува „центри за стручна обука”.
„Од 2014 година, во Ксинџијанг се уништени 1.588 насилни и терористички банди, уапсени 12.995 терористи и запленети 2.052 експлозивни направи, казнети 30.645 луѓе за 4858 незаконски верски активности и запленети 345.229 примероци од нелегален верски материјал”, е наведено во упатствата.
Само малкумина од санкционираните лица, како што се водачите на терористичките групи, добија строга казна, објаснуваат властите. Другите, на кои влијаел екстремистичкиот начин на размислување, добиваат образование и обука за да ги поучат за грешките во нивниот поглед на светот, објаснуваат упатствата.
