Министерството за здравство тврди дека компанијата „Канабис ОНЕ Доо Струмица“ немала добиено лиценца за одгледување на марихуана.
Од Министерството велат дека се невистинити информациите кои ги објави политичката партија ВМРО-ДПМНЕ на денешната прес-конференција, а се однесуваат на лиценца што наводно ја добила оваа компанија.
„Компанија со име „Канабис ОНЕ Доо Струмица“ нема добиено лиценца од Министерството за здравство, така што информацијата објавена од опозицијата е целосна невистина. Во Министерството нема ниту поднесено барање од „Канабис ОНЕ Доо Струмица“ за почнување на постапка за добивање на лиценца“, посочи Министерството во реакцијата.
Министерството упатува апел до политичките партии да се воздржат од пласирање лажни вести и невистини, како и од инволвирање на приватни субјекти и нивно етикетирање.
