Шефицата на Канцеларијата на Европската унија во Косово, Наталија Апостолова го повика премиерот Рамуш Харадинај да ја преиспита одлуката за такса од 100 отсто на увозот од Србија и Босна и Херцеговина, оценувајќи дека таа е спротивна на Договорот за стабилизација и асоцијација (ДСА), јави дописникот на МИА од Приштина.
Апостолова на одбележувањето на тригодишнината од потпишувањето на ДСА побара од Харадинај „да ја согледа пошироката слика” на состојбата, за да овозможи побрзо финализирање на дијалогот меѓу Приштина и Белград.
– Ние ја разбираме таксата од 100 отсто, меѓутоа време е да се види што е позначајно за Косово. Го повикуваме премиерот да ја преиспита уште еднаш одлуката, да ја согледа пошироката слика и да имаме побрза финализација на дијалогот, рече Апостолова.
Зборувајќи за визната либерализација, шефицата на Канцеларијата на ЕУ, од конференцијата во организација на Институтот ЕПИК им порача на косовските граѓани да не се разочаруваат.
– ЕУ вети дека слободата на движење ќе биде приоритет на дијалогот. Косово забележа прогрес во борбата против корупцијата. Гласањето во Европскиот парламент е доказ дека сте напреднале. Процесот треба да се развива и сега е во рацете на Советот. Немојте да се разочарувате затоа што не се одвива бргу, не може да се изврши автоматски. Чувствуваме еден вид болка кај вас. Мојата порака е да продолжите по тој исправен пат, чувате го тој прогрес, сигурна сум дека ќе има среќен крај, рече Апостолова.
