По повод Меѓународниот ден за подигање на свеста за аутизмот, кандидатот за претседател на државата, Гордана Силјановска-Давкова, оствари средба со дефектолог.
„Меѓународниот ден за подигање на свеста за аутизмот е само потсетување на секојдневната грижа на родителите, семејствата, училиштата и целото општество. Не е доволно да го одбележиме денот и утре да го заборавиме“, појасни Силјановска-Давкова.
Таа потсети дека во правично општество никој не смее да биде оставен сам бидејќи ниту еден живот не е помалку вреден од другите.
„Светот чекори напред со овозможување третмани и пристап до асистивни технологии, кои им го олеснуваат животот на овие лица со посебни потреби овозможувајќи им учество во животот на заедницата и поквалитетен живот“, истакна Силјановска-Давкова.
Таа нагласи и дека солидарноста е основа на секое правично општество.
„Ќе сторам сè во мојот мандат да потсетувам на реалните проблеми и на начините за нивно надминување. Аутизмот не е дефиниција на личноста, личноста е многу повеќе од тоа. Луѓето не треба да страдаат затоа што се поинакви, но страдаат од начинот на кој ги третира општеството“, истакна кандидатката за претседател.
