Климатските промени станаа прашање на национална безбедност и опстанок за многу земји, како што ја зголемуваат ранливоста на природните ресурси преку зголемената зачестеност и сериозност на екстремните временски настани.
Климатските промени, исто така, влијаат на производството на храна и вредносните синџири и предизвикуваат значителни штети и загуби во земјоделското производство, одгледувањето добиток, риболовот и шумарството.
Целта на дводневната конференција во Тирана, која започнува денеска, е да ги собере претставниците од Албанија, Северна Македонија, Босна и Херцеговина, Црна Гора и Србија, да разговараат за националните приоритети за климатска акција. Учесниците ќе ги дефинираат можностите за усвојување заеднички план за климатска акција за Западен Балкан, што би требало да послужи како основа за развој на регионални проекти и програми.
Голем број напори се вклучени во справувањето со климатските промени во земјите од Западен Балкан, вклучително воведување на климатските промени во националното планирање, јакнење на институционалната координација и знаење за развој на политики за климатски промени и спроведување на соодветни активности, решавање на недостатоците во податоци и подобрување на методологиите за проценка на влијанијата врз земјоделството и сродни сектори, собирање точни и ажурирани информации и воспоставување и ажурирање на базите на податоци за емисиите на стакленички гасови.
Земјите од Западен Балкан се обврзаа да обезбедат ефективна имплементација на Парискиот договор и Агендата 2030 за одржлив развој, а достапноста на финансиски ресурси за финансирање на итни мерки за ублажување на и прилагодување кон климатските промени е од голема важност за овие напори. За таа цел, ФАО им помага на земјите во пристапот до финансиски извори за животна средина и климатски промени, како Зелениот климатски фонд и Глобалниот фонд за животна средина.
„Економскиот раст на земјите од Западен Балкан зависи од природни ресурси чувствителни на климатските промени, што доведува до високи трошоци за ублажување и адаптацијата кон климатските промени”, истакна Владимир Рахманин, помошник-генерален директор на ФАО и Регионален претставник на ФАО за Европа и Централна Азија.
„Силно јавно чувство за одржливоста на животната средина и климата се појавува во сите делови на светот, но распределбата на финансиската поддршка е нееднаква, а земјите од Западен Балкан имаат потреба од зголемени финансиски ресурси за да можат да се соочат со климатските предизвици“, додаде тој.
Настанот, исто така има за цел да им помогне на земјите од регионот да ги споделат своите искуства, фокусирајќи се на можностите за меѓусебно надополнување на напорите за ублажување на климатските промени и за намалување на сиромаштијата. Ќе се разговара и до кое ниво се напорите на земјите за спроведување на националните придонеси кон климатските промени (NDC).
ФАО и Програмата за животна средина на Обединетите нации (УНЕП) соработуваат за да развијат детален прирачник за поддршка на напорите на земјите во Европа и регионот на Централна Азија за подобро разбирање на можностите и барањата за пристап до климатски финансии.
