ВМРО ДПМНЕ дрско лаже и залудно се труди да манипулира со граѓаните. Реконструкцијата на главниот пат, како и повеќе краци од водоводната мрежа во Долно Лисиче е веќе во тек, како и многу други проекти со кои ги решаваме проблемите на граѓаните, многу од нив наследени токму од претходното општинско раководство, предводено од ВМРО-ДПМНЕ, реагираат од Општина Аеродром на вчерашната прес конференција на опозициската партија.
-Патот во Долно Лисиче целосно се обновува и проширува, со што долгорочно се решава повеќегодишниот проблем со несоодветна инфраструктура за локалното население. Овој проект предвидува градежни активности и материјали што се според највисоки меѓународни стандарди. Паралелно, се реконструираат и 10 краци на водоводната мрежа во Долно Лисиче. Сите овие активности се одвиваат токму на локацијата кадешто Дејан Митески ја држи оваа прес-конференција со која бесрамно ги лаже граѓаните.
Во однос на висината на комуналиите во Долно Лисиче, го потсетуваме Митески дека тие се веќе околу четирикратно пониски во споредба со делот од Општината кој е опфатен со Генералниот урбанистички план. Она што е клучно е дека средствата од комуналиите се уплаќаат во општинскиот буџет за да можат да се реализираат инфраструктурните проекти кои се најважни за квалитетот на животот на граѓаните.
Општина Аеродром и понатаму продолжува да работи исклучиво во интерес на сите граѓани поеднакво. Ги повикуваме ВМРО-ДПМНЕ да престанат со десткруктивното делување и да ни се придружат за заеднички да создадеме подобри услови за живот во Аеродром, велат од Општината.
