– Со средбата на хрватската претседателка Колинда Грабар-Китаровиќ и кинескиот премиер Ли Кечијанг заврши работната посета на кинеската делегација на Загреб.
Оттаму, кинескиот премиер отпатува во Дубровник, каде ќе се одржи деловен форум на земјите од централна и источна Европа и Кина.
Претходно Ли имаше средба со хрватскиот премиер Андреј Пленковиќ.
– Разговорите ни беа искрени, пријателски и плодни, изјави Ли по средбата во загреб, каде допатува со голема бизнис делегација.
– Оваа посета е пресвртница во односите меѓу двете земји, оцени Пленковиќ.
Двете влади потпишаа шест договори во Zагреб, а уште четири ќе бидат потпишани утре во Дубровник. Договорите се однесуваат на железница, земјоделство, дигитална соработка на државната управа со Хуавеи, Хрватската банка за обнова и развој, наука и спорт. Следен голем конкретен проект се очекува да биде модернизација на пругата Загреб – Риека и на хрватските пристаништа.
Кинеската делегација е составена од 400 претставници на кинески државни и приватни компании и банки, кои утре и задутре во Дубровник ќе учествуваат на средбата на шефови држави или влади од Иницијативата Кина + 16 (11 членки на ЕУ од централна и источна Европа, како и Северна Македонија, Србија, БиХ, Црна Гора и Албанија), како и на деловниот форум на кој ќе има околу илјада учесници.
