Премиерот Зоран Заев денеска повтори дека не очекува претседателот Ѓорге Иванов да ги помилува лицата осудени за случајот „27 април”, бидејќи не постои таква можност во законот, но и затоа што вакви постапки се забранети за време на изборни кампањи.
-Јасно е како бел ден. Членот 11 од Законот за помилување не постои, тој е укинат и не може да се делува по него. Постапките се водат преку правда и тие може да стигнат до претседателот на РСМ, но не може да се водат за време на избори. Тие се забранети постапки, влијаат на изборниот процес затоа што влијаат на самите гласачи. Може да се водат откако ќе завршат претседателските избори. Тие завршуваат на 5 мај, официјалното завршување го прогласува ДИК согласно роковите за жалби и завршните извештаи, а мандатот на претседателот Иванов е до 12 мај, така што не очекувам никаква аболиција од негова страна. Како што слушам, пак, идниот претседател јавно вети дека нема да дава вакви аболиции затоа што не постои таква законска можност, рече премиерот Заев одговарајќи на новинарско прашање по оддавањето признание на олимпијците од Спортската параолимпијада во Владата.
