Српскиот претседател Александар Вучиќ коментирајќи го вчерашниот протест на опозицијата на новинарите им изјави дека од терасата на претседателството ги слушал и дека на митингот немало повеќе од 7.500 лица.
Вучиќ оцени дека вчерашниот собир покажал дека опозицијата може да го помине изборниот цензус и изјави дека спикерот на српскиот парламент Маја Гојковиќ, ги поканила на дијалог и дека тоа е место на кое треба да се разговара.
-Што се однесува до нас, ние сме подготвени за дијалог. Маја Гојковиќ ги покани на дијалог на место на кое се води тој, а ако фашистичкиот заменик на фашистичкиот лидер Кипријановиќ не сака со претседателката на Парламентот, толку подобро. Разбудете го (Димитрије) Љотиќ и разговарајте со него, рече Вучиќ.
Тој порача дека, според законот, не може да се исполнат условите за промена на составот на РЕМ, бидејќи таму не можат да бидат партиски луѓе, како и дека не можат да менуваат кадри во РТС, бидејќи тоа би било директно нарушување на јавниот сервис.
-За РТС мислам полошо отколку тие за нивните кадри и луѓе, но не можеме ние да зборуваме за тоа, бидејќи би било директно нарушување на независноста на јавниот сервис, рече Вучиќ.
Тој оцени дека протестот на опозицијата е бесмислен, не станало збор за каква било програма и дека цело време го навредувале.
Вучиќ изјави дека во петок на 19 април ќе ја покаже насоката, планот и иднината на Србија, ќе понуди сериозна содржина и ќе ја открие својата намера за претстојниот период.
– Вчера бев на тераса и ги слушав говорниците. Звукот беше одличен, иако живата душа не беше во близина на Претседателството. Слушнав навреди на мојата сметка по илјадити пат и чекав да се вратат. Да не се гаѓаме со лажни бројки, тие се бројат во главата и никој нема да ги преброи повеќе од информациите што ги имаме. Со хистерија и лагите се обидоа да го сокријат своето незадоволство и цело време ги мамеа луѓето за бројот на луѓето. Немаше повеќе од 7.500 луѓе и ова не е број за потценување, кој посочува дека можат да го поминат цензусот, рече Вучиќ, потсетувајќи дека Гојковиќ ги повикала на разговор, кој го одбиле.
Тој истакна дека не се точни наводите на „Спутник” оти имало 50.000 граѓани.
-Тоа што го кажа „Спутник” е непромислена и груба лага, рече Вучиќ.
Српскиот претседател, исто така, потенцира дека не се плаши од опозицијата и нивните закани и ги повика да го спроведат насилството кое го повикуваат.
Вучиќ на новинарите им рече дека е многу загрижен за сè на Косово, како и за претстојната средба во Берлин.
-Загрижен сум за сè и поради средбата во Берлин. Не затоа што се плашам од каков било притисок, ниту, пак, мислам дека ќе биде, туку затоа што не гледам како понатаму, ниту колку далеку со луѓето кои се толку неодговорни како албанските лидери денес. Тоа е причината зошто кај мене постои голем страв, но сето ова ќе нè натера на уште посериозно и поодговорно однесување, им изјави Вучиќ на новинарите откако го посети клиничкиот центар на Србија во Белград.
