Агенцијата за аудио и аудиовизуелни медиумски услуги ги потсетува радиодифузерите дека денеска е крајниот рок за објавување резултати од испитувањето на јавното мислење.
Согласно Изборниот законик, анкетите на јавното мислење може да се објавуваат најдоцна пет дена пред датумот одреден за гласањето, односно најдоцна до полноќ на 15 април 2019 година.
Воедно, Агенцијата потсетува дека изборниот молк почнува 24 часа пред денот на гласањето, односно од полноќ на 20-ти април 2019 година (сабота) и завршува со затворањето на гласачките места во 19 часот на 21-ви април 2019 година.
Радиодифузерите за време на изборниот молк продолжуваат да известуваат за активностите на Државната изборна комисија и за изборниот процес на денот на гласањето, но не смеат да објавуваат какви било информации, фотографии, аудио и аудио-визуелни материјали поврзани со или во кои учествуваат учесници во изборите; какви било облици на медиумско известување кои се отворено или прикриено во функција на нечија изборна кампања и можат да влијаат врз одлуката на избирачите; податоци со кои го откриваат идентитетот на политичките субјекти и/или на поединци вклучени во инциденти или други неправилности на денот на гласањето како и изјави од кандидати во изборниот процес, од учесниците во изборна кампања, од претставници на политички партии, и од носители на функции во органите на власта.
