Напаѓачот на Барселона, Луис Суарез смета дека доколку Ливерпул станеше шампион на Премиер лигата во 2014-та година, тоа ќе го надминело по значајност постигнувањето од евентуална титула во оваа сезона под водство на Јирген Клоп.
Уругваецот, кој го напушти Ливерпул и замина кон „Камп Ноу” истата 2014 година, ќе се соочи со својот поранешен клуб за прв пат по разделбата со „црвените”, кога Барселона го пречекува дома Ливерпул во првиот полуфинален натпревар од Лигата на Шампионите во среда вечер.
Во посочената сезона 2013/14, шампион стана Манчестер Сити, а Ливерпул пропуштија клучни бодови против Челзи и Кристал Палас на крајот на сезоната, кои го чинеа прва титула во ерата на Премиер лигата.
– Тогаш беше поинаку. Ако ја освоевме лигата, сметам дека тоа ќе беше позначајно достигнување, од она што тимот евентуално ќе го постигне сега. Кога бев таму, беше многу поинаку. Бевме толку блиску до титулата во Премиер лигата со тим кој не беше ни блиску до сегашната класа. Тие не трошеа толку пари за играчите како што направија сега. Секој фудбалер би сакал да оди во Ливерпул сега. Разбирам низ што поминуваат и тоа не е лесно, но мислам дека кај нас беше поинаку, бидејќи ситуацијата беше „сега или никогаш”, изјави поранешниот напаѓач на тимот од Мерсисајд за „Гардијан”.
Ливерпул го декласираше дома Хадерсфилд со 5:0 и се искачи повторно на врвот во првенството, откако има предност од два бода пред актуелниот шампион Манчестер Сити, кој има натпревар помалку. По заминувањето на Суарез во насока Барселона, тимот ги привлече Вирџил Ван Дајк за 75 милиони фунти, Алисон за 66.8 милиони фунти, Наби Кеита за 48 милиони фунти, Фабињо за 39 милиони фунти и Мохамед Салах за 36 милиони фунти..
Триесет и две-годишниот стрелец на Каталонците, кој постигна 82 гола во 125 натпревари во сите натпреварувања за време на тригодишниот престој на „Енфилд”, е свесен за офанзивната моќ на Ливерпул, кога ќе се соочи сонив на „Камп Ноу” во средата вечер.
– Тројцата во напад се многу брзи, добри техничари се и многу талентирани – тие се играчи кои ја прават разликата и резултатите на Ливерпул зависат од нивното претставување. Тие се од оној тип играчи, против кои е задоволство да играш – тие одговараат на нивото на Ливерпул, а тимот е изграден да триумфира како во Премиер лигата, така и во Лигата на шампионите, заврши уругвајскиот стрелец.
