Ужасна импровизација и нехуман третман на животните се судбина на кучињата во Штип, тврди „Анима мунди“. Според нив, ветеринарните лица масовно еутаназираат (официјално 1/3 од заловените кучиња), а патем ја лажат јавноста дека кучињата се закана по здравјето на граѓаните, а дека одговорноста за граѓанската безбедност лежи на ветеринарните лица.
„Потенцираме дека болеста лишманија не се пренесува преку кучињата преку никаков контакт – допир, галење, играње, а ниту, пак, со угриз од животно; туку исклучиво преку мушички преносители и само со нивно сузбивање се сузбива ризикот по човечкото здравје.
Во однос на времената дозвола за работа издадена од АХВ со која се стави во функција лимениот „стационар“ во општина Штип, во кој во лето ни камили не би опстоиле, а камоли кучиња, најгрубо се кршат одредбите од Законот за заштита и благосостојба на животните, како и Правилниот за техничките услови за прифатилишта, за што ќе поднесеме тужба”, велат од здружението.
