Франција, Германија и Обединетото Кралство во заедничката изјава вчера изјавија дека ќе останат целосно посветени на одржување и целосно спроведување на иранскиот нуклеарен договор, познат и како ЈЦПОА, пренесува „Спутник“.
Трите нации изразија загриженост во врска со претходната одлука на Техеран за прекинување на дел од своите обврски од договорот. Тие го повикаа Техеран да продолжи со целосна имплементација на своите обврски според нуклеарниот договор.
Тие ја истакнаа својата посветеност да продолжат со напорите за обезбедување легитимна трговија со Иран, вклучително и преку INSTEX, механизмот на ЕУ за билатерални трансакции со Иран, заобиколувајќи ги американските санкции.
Трите европски земји ги повикаа страните надвор од нуклеарниот договор да не создаваат пречки за своите потписници во исполнувањето на нивните обврски.
На 8 мај 2018 година, Трамп ја објави својата одлука да го напушти иранскиот нуклеарен договор од 2015 година и да ги врати строгите санкции за Техеран, вклучувајќи и секундарни санкции против компаниите и финансиските институции од земјите што вршат бизнис со Исламската Република.
