Факултетот за информатички и комуникациски технологии-ФИКТ кој работи во состав на Универзитетот „Св.Климент Охридски”-Битола, од денес продолжува да работи во нови простории.
Новиот современ објект свечено го отворија ректорот на УКЛО, Сашо Коруновски и деканот на ФИКТ-Битола, Игор Неделковски со соработниците.
-Факултетите за информатички и комуникациски технологии се јадрата од каде што почнува развојот на еден универзитет. Тоа се места каде што се откриваат новите технологии и се ставаат во употреба. Сигурен сум дека ФИКТ и овој модерен објект имаат перспектива и со гордост ќе го промовираат нашиот Универзитет. Универзитетот рационално и наменски ги користи сите средства што ги добива од државата, за да градот и универзитетот бидат во функција на регионот и развојот на државата, истакна ректорот Коруновски на свеченоста во Битола.
Факултетот за информатички и комуникациски технологии-ФИКТ почна со работа во 2014 година и досега беше сместен во еден од адаптираните објекти на поранешната битолска касарна.
-Сонот стана јаве. Почнуваме со работа во новите простории, а првиот настан е натпревар во програмирање за средношколци со што ја акцентираме соработката на универзитетот со средните училишта, но и со ИТ-индустријата, бидејќи на овој натпревар како евалуатори учествуваат и претставници на ИТ-индустријата. Во Битола пристигнаа 19 тимови од повеќе македонски градови, оценувањето ќе го врши посебна комисија која за најдобрите ќе додели награди и признанија, посочи деканот на ФИКТ, Игор Неделковски.
Новата зграда на ФИКТ има нова опрема, повеќе компјутерски училници и лабаратории. Од ФИКТ најавија дека ќе објават повик до ИТ-компании да финансираат во опремување на лабаратории.
-Среќни сме што за нашата професија има „глад” од квалитетен кадар и очекуваме компаниите да покажат интерес за заеднички лабаратории на ФИКТ, нагласи Неделковски на промотивниот настан во овој Битола.
