Европската унија денеска упати апел до САД и Иран за смирување на тензиите во регионот.
– Не треба да се произведува нова нестабилност, изјави Маја Коцијанчиќ, портпаролката на високата претставничка на ЕУ за надворешна и безбедносна политика Федерика Могерини. Таа нагласи дека е многу важно да се избегнува секаков облик на провокација и насилство.
– Потребно е да се преземат потребните напори за намалување на напнатоста, препорача Коцијанчиќ преку Твитер.
Иранскиот министер за надворешни работи Џавад Зариф денеска го спореди американскиот претседател Доналд Трамп со воинствени владетели од минатото, како Џингис Кан и Александар Велики, потенцирајќи дека Иранците „опстојувале во текот на милениумите, додека агресорите исчезнувале”
Зариф на Твитер оцени дека Трамп е „втурнат во геноцидни забелешки” и дека се обидува да го постигне она „што не успеале Александар (Велики), Џингис (Кан) и останатите агресори”.
Трамп синоќа повторно му се закани на Техеран, порачувајќи му дека евентуален конфликт ќе биде официјален крај за Иран.
– Ако Иран сака да се бори, тоа ќе биде официјален крај на Иран. Никогаш повеќе немојте да им се заканувате на САД, напиша Трамп на Твитер.
