Трансфер политиката на Барселона долго време беше пример за добро работење, но тој тренд веќе не важи во изминативе години. Каталонците веќе не се специфични на пазарот и за нивната традиција сега само се раскажуваат приказни.
Огромни проблеми создадоа зделките што клубот ги направи по трансферот на Нејмар во ПСЖ за 222 милиони евра, што беше најголемиот светски трансфер во историјата. Тој потег значеше зголемување на цената на многу играчи за кои не би се плаќале тие суми да не се „случеше“ Нејмар, а тоа најдобро се гледа во купувањето на Дембеле и Кутињо во Барса. Двајцата беа донесени бидејќи мораше да се надомести неочекуваното заминување на Нејмар, па играчите во паника беа натплатени за да се смират незадоволните навивачи кои протестираа поради начинот на кој Бразилецот замина од Ноу Камп.
Колку за потсетување, откако го продаде Нејмар, Барселона ги донесе Усман Дембеле и Филипе Кутињо и ги плати 270 милиони евра. Ги донесе и Паулињо, Нелсон Семедо, Јери Мина, а минатото лето и Малком, Клемент Ленгле, Џерард Деулофеу, Артуро Видал и Кевин Принс Боатенг.
Барса има две големи желби
За квалитетите на Френки де Јонг кој летово направи „дил“ за 75 милиони евра, допрва ќе се зборува и во следната година, а не треба да се заборави дека во план е да се купи и Антоан Гризман. Каталонците се надеваат на Матијс де Лихт, но за да го донесат треба прво да ги победат Јувентус и ПСЖ, два великана кои исто така се заинтересирани за Холанѓанецот.
Французите му понудија двојно поголема плата од она што го нуди Барса, но приказната уште е отворена. Од друга страна, медиумите шпекулираат дека Французинот веќе одамна се одлучил за Барселона и дека е само прашање на време кога ќе потпише.
Се планираат големи бројки и расходи, па билансот ќе мора да се реши со продажби. Грубо пресметано, Барселона во изминатите две години потроши над 500 милиони евра и заработи околу 360 милиони долари од продажби, така што е во минус околу 140 милиони евра.
Кој си заминува?
Најголемата енигма на оваа генерација на Барселона е Кутињо. Бразилецот на отворањето на Копа Америка постигна два гола за репрезентацијата и покажа дека не е проблемот (само) во него, туку дека не му одговара составот на Барселона, односно философијата на Ернесто Валверде. Без оглед на оправдувањата што може да се најдат за неговата игра во Барселона, од играч платен 140 милиони евра се очекува повеќе.
Тежок случај е и Иван Ракитиќ кого Барса ќе го стави на трансфер листата. Хрватот подолго од една година чека подобар договор и моментално зеде „тајм аут“ од репрезентацијата, но и од клубот каде помина пет години. Во меѓувреме, медиуми блиски до клубот објавија дека Валверде се согласил Ракитиќ да оди на трансфер листата, ако се отвори простор за засилувања. Барселона бара околу 35 милиони евра, а Ракитиќ е во контакт со Интер. Се спомнуваат и некои англиски клубови, но нема ништо поконкретно.
