Американскиот претседател Доналд Трамп синоќа на Твитер објави дека „на барање на демократите” ја одложил масовната депортација на илегалните мигранти, што беше планирана за денеска.
Трамп им даде рок од две недели на демократите и републиканците во Конгресот да се договорат за решавање на проблемите на јужната граница на САД, а во спротивно ќе нареди отпочнување на депортација.
– На барање на демократите го одложив процесот за отстранување на илегалните мигранти (депортација) на две недели, за да видам дали демократите и републиканците можат да седнат и заедно да изнајдат решение за проблемите со азилот и дупките на јужната граница. Доколку не можат, почнува депортацијата!, наведе Трамп на Твитер.
Тој вчера им нареди на надлежните служби да спроведат масовна депортација на мигрантите на кои им е наложено да заминат од САД.
Со депортацијата, според американските медиуми, требаа да бидат опфатени околу 2.000 семејства од големите градови.
