Руското Министерство за надворешни работи денеска соопшти дека американскиот економски план за Блиски Исток во висина од 50 милијарди долари е контрапродуктивен.
Економскиот план предвидува создавање на глобален инвестициски фонд за унапредување на палестинската економија и економијата на соседните арапски држави и изградба на транспортен коридор кој ќе ги поврзува Западен Брег и Појасот Газа.
Палестинската ослободителна организација (ПЛО) вчера го одби американскиот економски план оценувајќи дека истиот нема политичка визија, поради што е осуден на неуспех.
ПЛО тврди дека САД со економскиот план „само ќе продолжи заробеништвото на Палестинците”.
Економскиот план за Блиски Исток вчера беше претставен на конференција во Бахреин, а ПЛО ја обвини Белата куќа дека го искористи собирот како покритие за настојувањето на Израел да ги нормализира односите со арапските земји и да ги подигне своите населби на окупираниот Западен брег.
ПЛО во соопштението истакна дека мирот не може да биде постигнат се додека не заврши „израелската окупација и економската доминација”.
