Бугарската Влада денеска донесе одлука за купување на осум нови американски воени авиони Ф-16 од компанијата „Локид Мартин” по цена од 1,25 милијарди американски долари (1,12 милијарди евра), изјави заменик министерот за одбрана Атанас Заприанов.
Тој додаде дека Владата одлучи да потпише четири договори за набавка на авиони Ф-16 Блок 70 со неопходната опрема.
Бугарија, која е членка на НАТО од 2004 година подолг период се обидува да ја замени застарената флота на авиони ловци МиГ-29 од советскиот период.
Шест авиони Ф-16 се со едно седиште, а два се со две седишта и ќе бидат испорачани најдоцна до 2023 година. Авионите покрај другото ќе бидат опремени и со проектили воздух-воздух и воздух-земја.
Тоа е најголема воена набавка на Бугарија од падот на комунизмот пред 30 години.
„Локид Мартин” кон крајот на минатата година со Словачка потпиша договор за испорака на 14 авиони Ф-16 за 1,58 милијарди евра.
