Бесплатно и анонимно тестирање за хепатитис Ц денеска во ТЦ „Рамстор мол” во Скопје организира Здружението Хепар центар Битола, по повод Светскиот ден за борба против хепатитис.
Целта на настанот, како што информираат од Здружението, е подигнување на свесноста за борба против хепатитис Б и Ц, како јавноздравствен проблем на светско и на европско ниво. Кампањата продолжува во наредните денови во Битола, Охрид и во Струга. Настанот е поддржан од Министерството за здравство, Центарот за јавно здравје Битола, Универзитетската клиника за гастроентерохепатологија и Црвениот крст.
Статистиките на глобално ниво покажуваат дека 80 отсто од инфицираните со хроничен хепатитис Б или Ц, доколку навремено не се третираат, може да добијат карцином на црниот дроб или малигно заболување, хепатоцелуларен карцином, што претставува директна опасност по животот на пациентот, посочуваат од Хепар центар Битола.
