Претставата „Несоодветно за на работа” („Not Safe for Work”) на Драмски театар – Скопје, вечер премиерно ќе биде изведена во Центарот за култура во Охрид, во рамки на фестивалот „Охридско лето”.
Режисер на претставата е американскиот актер и професор Доналд Ворен Мофет, кој престојува во Скопје, а е напишана од британскиот драматург и драмски писател Луси Кирквуд.
Улогите ги толкуваат Ирена Ристиќ, Сања Арсовска, Игор Ангелов, Зоран Љутков, Дамјан Цветановски и Стефан Вуисиќ. Сценограф е Константин Трпеновски, а костимограф Александар Ношпал.
Директорот на Драмскиот театар, Викторија Рангелова Петровска на прес-конференција рече дека претставата е уште едно продолжение на веќе востановената програма доставена до Министерството за култура во однос на тоа дека Драмскиот театар се движи во насока на промоција на современа драматургија.
– Луси Кирквуд е претставник на младиот бран драматурзи и драмски писатели од Велика Британија и е поврзана со една битна струја, а тоа е феминистичкиот правец. Од тука произлегува дека оваа драма се занимава со таа проблематика и со проблематиката на демонстрација на моќ која е поврзана со проблемите околу родовите и со објективизација на женското тело. Тоа се две линии кои се доминантни во овој драмски текст. Во претставата ќе настапат и двајцата нововработени млади актери во Драмскиот театар, Дамјан Цветановски и Стефан Вујисиќ, истакна Рангелова Петровска.
Ворен Мофет рече дека во САД една претстава се подготвува три до четири недели, затоа што времето е пари, а тука претставата се подготвувала пет недели. Тој посочи дека сака повторно да дојде во државава и сака да сними серија и филм.
– Тука има одлични актери. На моите пријатели и соработници ќе им пренесам да дојдат во Скопје, затоа што ова поднебје е неоткриено, самиот град е уникатен, не е американизиран, како и останатите делови од Америка и тоа му дава посебен дух, додаде Мофет.
Актерот Љутков, кој во претставата ја толкува улогата на Ејдан, рече дека се презаситиле од македонскиот начин на режирање, нивната меѓународна соработка е послаба последниве неколку години и ретко можат да споделуваат други искуства. Годинава, како што потенцира, тоа не е случај ,бидејќи имаат двајца режисери од странство.
– Многу ми се допадна начинот на кој функционира режисерот, за брзината на работата, начинот на мислење и функционирањето на театарот. После многу долго време на десет дена пред премиерата се чувствував како да можам веднаш да се појавам на сцена и не се залудни овие неколку генерални проби, додаде Љутков.
Актерката Сања Арсовска, која ја игра улогата на Шарлот, истакна дека претставата на еден софицистициран досетлив начин не потсетува на тоа дека капитализмот во кој живееме и светот во оваа состојба во која се наоѓа, ни ги уништува сите идеали.
Претставата „Несоодветно за на работа” на крајот на септември премиерно ќе биде изведена во Скопје.
