Киргистанската полиција уапсила повеќе од 40 приврзаници на поранешниот претседател Алмазбек Атанбаев, во текот на немирите во главниот град Бишкек.
Немирите беа ставени под контрола неколку часа по апсењето на експретседателот Атамбаев, а полицијата сега работи на идентификувањето на организаторите на протестите, пренесе Тасс.
Околу 1.000 приврзаници на Атамбаев се собраа синоќа на главниот градски плоштад, барајќи оставка од актуелниот претседател Соронбај Женбеков.
Половина час подоцна полицијата успеа да ги растера, повремено користејќи и шок бомби.
Според последните податоци, 98 лица побарале медицинска помош.
Атамбаев, кој е обвинет за корупција, вчера им се предаде на властите, по акцијата на апсење на специјалните единици на полицијата, која траела цели 24 часа.
Киргистанските специјални сили во средата ја почнале акцијата за апсење на Атамбаев, меѓутоа, неговите приврзаници пружиле жесток отпор при што еден припадник на специјалните сили загинал, а 52 лица се повредени, меѓу кои имало и новинари.
Киргистанските безбедносни сили вчера почнале нова акција за апсење, а приврзаниците на Атамбаев повторно се собрале.
Претседателот Женбеков вчера изјави дека Атамбаев го прекршил Уставот на земјата со давањето вооружен отпор на полицијата.
