Заменик-претседателот на Владата задолжен за европски прашања, Бујар Османи, од денеска е во работна посета на Финска, каде што ќе оствари работни средби со министерката за европски работи, Тути Тупураинен, и со министерот за надворешни работи, Пека Хависто. На средбите предвидено е да се разговара за очекувањата и перспективите на Северна Македонија во претстојниот период, како и за активностите и поддршката од страна на Република Финска во рамките на финското претседателство со Европската Унијата, а во контекст на претстојната одлука за почеток на преговорите во октомври оваа година.
Во рамките на посетата вицепремиерот Османи ќе оствари средба и со претставниците на Големиот комитет (Grand Committee) во рамките на финскиот парламент, предводени од првиот заменик-претседател на парламентот, Јани Макела.
Во агендата на Османи е и посета на Директоратот за автономија и еднаквост, при Министерството за правда на Република Финска, каде што ќе оствари средбата со Тимо Маконен, директор на одделот, како и со Корина Таменма, висока претставничка за јазичните прашања. На средбата се очекува да бидат разменети искуствата за успешна имплементација и примена на двојазичноста во Финска, а ќе бидат разгледани можностите за соработка во оваа насока, со цел успешна имплементација на Закон за употреба на јазиците во земјава.
