Лидерот на терористичката мрежа Ал Каида Ајман ал Завахри ги повика муслиманите да нападнат цели во САД, Европа, Израел и Русија, во говор по повод 18 години од терористичките напади во САД на 11 септември.
Во видео снимка што ја објави милитантна група, Ал Завахри (68) ги критикуваше и „повратниците” од џихад, обраќајќи им се на оние кои во затвор го смениле ставот за нападите на 11 септември и сега го сметаат за неприфатлив поради цивилните жртви.
– Ако сакате џихадот да се фокусира само на воени цели, американската армија е присутна во целиот свет, од исток до запад. Вашите држави се полни со американски бази, и со сите тие неверници и корупцијата што ја шират, вели Ал Завахри на снимката.
Ал Завахри е Египќанец кој стана лидер на Ал Каида после убиството на Осама бин Ладен во 2011 година. Се претпоставува дека се крие некаде во пограничниот регион меѓу Авганистан и Пакистан, а според извештај на ОН тој е во лоша здравствена состојба, но не се наведуваат други детали.
