Оваа недела светска тема е Грета Тунберг, 16-годишната Швеѓанка, која одржа драматичен говор на климатскиот Самит на ОН во Њујорк.
Тинејџерката која е активист против климатските промени, во обраќањето ги обвини светските лидери за нивната неактивност во борбата против глобалното затоплување, велејќи дека со тоа ја ограбиле од нејзиното детство.
Ставајќи се во центарнот на вниманието на светската јавност, Грета привлече и многу критики, но и навреди на сметка на нејзиниот изглед, облеката, формата на аутизам од која страда и сл. Многумина ја нарекоа и изманипулирано дете кое се користи за да ги продлабочи поделбите во светот.
Грета јасно стави до знаење дека е свесна за сите навреди кои се пишуваат на нејзина сметка, но до сите критичари упати порака дека наместо да се занимаваат со неа, треба да се обидат да направат промена и да му помогнат на светот. Во објава на „Твитер“ тинејџерката напиша:
„Како што можеби забележавте, хејтерите се активни како и секогаш – се занимаваат со мене, мојот изглед, мојата облека, моето однесување и моите разлики. Тие излегоа со секоја можна лага и теорија на заговор.
Се чини дека се подготвени да ја минат секоја можна линија за да го оттргнат фокусот, бидејќи се премногу очајни да зборуваат за климата и еколошката криза. Да се биде различен не е болест а сегашната, врвна наука, не може да се третира само како пишани мислења – тоа се факти.
Искрено не разбирам зошто возрасните би избрале да го користат своето време за да ни се потсмеваат и да ни се закануваат нам, тинејџерите и децата кои промовираат научни факти, кога наместо тоа би можеле да направат нешто добро. Претпоставувам дека веројатно се чувствуваат загрозени од нас.
Но, не трошете го вашето време давајќи им повеќе внимание. Светот се буди. Промените доаѓаат без разлика дали сакале тие или не. Се гледаме на улиците во петок!“, порача во пораката младата активистка.
Таа објави фотографија како се враќа од САД кон Шведска на нејзината сега веќе култна едрилица, со која плови по Атлантскиот океан затоа што верува дека авионите испуштаат премногу гасови кои придонесуваат за ефектот на стаклена градина.
