Претседателот на Собранието Талат Џафери денеска оствари средба со новоименувата шведска амбасадорка во земјава Кристин Форсгрен Бенгтсон, на која била најавена новата развојна стратегија на Шведска за периодот 2021-2028, што ќе опфати дел посветен особено на Република Северна Македонија, со силно нагласени приоритети за европската агенда.
Амбасадорката Бенгтсон, информира собраниската Прес-служба, го истакнала задоволството што ја претставува својата земја во Република Северна Македонија и изразила уверување дека во нејзиниот мандат очекува да даде голем придонес во нашето интегрирање во Европската Унија.
– Кралството Шведска силно ја поддржува европската интеграција на Западен Балкан и тоа веќе еднаш го покажа во рамките на претседавањето со Советот на Унијата во 2001 година, како и во подготовката на Охридскиот рамковен договор. Позицијата на шведската Влада во однос на актуелните предизвици кон европското проширување е дека, Европската Унија треба да покаже категорична поддршка на овој процес, бидејќи кохезијата во целата Унија не е можна без регионот на Западен Балкан, се вели во соопштението.
Во однос на билатералната соработка, Шведска подготвува нова Развојна стратегија за периодот 2021-2028, што ќе опфати дел посветен особено на Република Северна Македонија, со силно нагласени приоритети за нејзината европска агенда. И понатаму приоритетите ќе бидат демократијата и владеењето на правото, животната средина, безбедноста и пазарната економија, но ќе се работи врз значително повисок степен на интеграција, поради очекуваното отворање на пристапните преговори.
Џафери, како што информира собраниската Прес-служба, и посакал топло добредојде на Форсгрен Бенгтсон во Република Северна Македонија, со желби за успешен амбасадорски мандат и потенцира дека, со Амбасадата на Кралството Шведска во Скопје, континуирано имаме многу блиска и конструктивна соработка, што е одраз и на фактот што нашите две држави историски негуваат отворени, блиски и пријателски односи, базирани на меѓусебна поддршка и разбирање.
Особен акцент е ставен и на блиската и континуирана соработка меѓу Собранието на Република Северна Македонија и Парламентот на Кралството Шведска, со взаемни посети и размена на искуства од парламентарните практики.
Џафери, исто така, ја реафирмирал благодарноста за силната поддршка на Шведска на евроатланската интеграција на земјава, особено ценејќи го фактот што Стокхолм е силен поборник на политиката на проширување, имајќи предвид дека не сите земји членки на ЕУ го делат истиот ентузијазам и ја поздрави ревизијата на Стратегијата на шведската Влада за развојна соработка со Источна Европа, Западен Балкан и Турција 2014-2020, со обнова на билатералната компонента во соработката меѓу Шведска и Република Северна Македонија. Од особено значење е и Декларацијата за соработка меѓу Република Северна Македонија и Кралството Шведска, со која се реафирмира поддршката за нашите стратегиски приоритети и се дефинираат конкретни области од заемен интерес, на билатерален и на мултилатерален план. Тој исто така посочил дека, шведската поддршка на интеграцијата на Република Северна Македонија во НАТО е високо ценета, имајќи ја предвид шведската неутралност во воените сојузи.
На средбата, Џафери ја информирал амбасадорката и за финализирањето на членството на башата земја во НАТО Алијансата, при што очекувањата се на почетокот на следната година да станеме 30-та полноправна земја-членка, имајќи во вид дека се останати вкупно шет земји-членки чии парламенти треба да го ратификуваат Пристапниот протокол, по што ќе следи и официјализирањето на полноправното членство и ратификацијата на основните НАТО протоколи во нашето Собрание.
Двајцата соговорници во овој контекст споделиле видувања дека, членството во Алијансата дополнително ќе ја зајакне регионалната стабилност и безбедност, но и ќе значи голема економска придобивка за самата држава, како што тоа се покажало и досега кај сите ново примени земји-членки.
