Ниту еден бизнис и општеството воопшто не смее да си дозволи да отфрли настрана половина од човечкиот потенцијал и да не го искористи за сопствениот развој. Прашањето на родовата еднаквост, и економското јакнење на жените е од исклучителна важност не само во постигнувањето на економскиот и општествениот развој, туку и за борбата на девојките и жените во справување на предизвиците со кои се соочуваат, како насилството, дискриминацијата и сиромаштијата.
Ова се генерално пораките што ги испратија дел од учесниците на Mеѓународната конференција „Жени во индустријата” која се одржува денеска и утре во Скопје, во организација на Асоцијацијата на здруженија на инженери и ЕВН Македонија АД.
Премиерот Зоран Заев обраќајќи се на конференцијата рече дека родовата еднаквиост како прашање е високо на агендата на Владата, бидејќи, како што рече, сака да создаде општество со еднакви можности за сите. Без родова еднаквост, рече не е можно ни остварување на ниту една од целите за одржлив развој, како една од обврските кои ги преземала државата.
-Ниту една земја не може да си дозволи да остави половина од својата популација зад себе. Тоа не смее да биде прифатливо за никого. Ние нема да запреме додека целосно не ја анулираме разликата во вредноста на трудот на мажите и жените, нема да запреме со спроведување на политиките за родова еднаквост додека не обезбедиме дека девојките и жените имаат апсолутно еднакво право да напредуваат во нивните кариери и да бидат избрани на највисоките работни позиции. Намалувањето на родовиот јаз во платите може да придонесе за поголем економски развој, еднаквоста на пазарот на труд може да ја поттикне мотивираноста и вклучување на жените и значаен придонес за долгорочниот раст во економијата, рече Заев.
Според него, економското зајакнување е одговорт на многу од прашањата со кои се соочуваат девојките и жените. Економски силни девојки и жени, рече, полесно ќе се справат со сиромаштијата, насилството и дискриминацијата, со остварувањето на нивното природно право да бидат еднакви во изборот на работни места.
Американската амбасадорка во земјава Кејт Мари Бернс рече дека инвестирањето во јакнењето на жената значи инвестирање во иднината.
– Нашата цел треба да биде ниту еден талент, идеја или напор да не бидат отфрлени или залудно потрошени само затоа што доаѓаат од жени, а не од мажи. Предизвиците со кои се соочуваат нашите економии и општестват бараат ангажман и идеи од жените, рече Бернс.
Мора, додаде амбасадорката, да го промениме ставот кој е присутен дури и кај младите жени и девојките кои можеби мислат дека професии како наука, технологија, енергетика, инжинерство… не се за нив.
– Се надевам дека ова ќе се промени, а оти тие во борбата за таквата промена ќе ја добијат поддршката од нивните учители, ментори, родители и од целото општество, истакна Бернс.
И Штефан Петер, претседател на Управниот одбор на ЕВН Македонија, смета дека родовата еднаквост не е важно прашање само за жените, или само за мажите. Тоа, рече, е важно прашање за општеството, но и за бизнисот, затоа што бизнисот не може да си дозволи да остави една половина од популацијата и човечките ресурси настрана и да не ги користи.
– Се обидуваме да го намалиме овој јаз меѓу мажите и жените и да се обидеме да обезбедиме многу пофер и балансирана околина во бизнис секторот за мажите и жените, рече Петер.
Христина Спасевска, професор на Електротехничкиот факултет и претседателна Асоцијацијата на здруженијата на инженери, вели дека сите направени истражувања и анализи на податоците покажуваат дека жените се добри студенти, завршуваат факултети, дури и напредуваат научно, но оти кога станува збор за добивање топ позиции во компаниите тоа многу ретко се случува.
– Нашата идеја е да се работи токму со нив да се окуражат и да пробаат да си ги заземат местата кои им следуваат по квалитет, рече Спасевска.
Според неа, анализите покажале и дека во земјите што припаѓаат на постсоцијалистичкиот блок балансот помеѓу мажите и жените на позиции е подобар за разлика од високо развиените демократски општества.
Дводневната конференција се одржува под мотото „Здружени лидери за унапредување на родовата еднаквост” и ќе вклучи учесници од различен профил, меѓу кои извршни директори, сопственици, претседатели, менаџери и жени вработени во сите организациски нивоа на домашни и меѓународни компании, како и студенти и активисти.
