Жителите на Барселона излегоа на улиците на градот на спонтан протест против одлуката на Врховниот суд да изрече долгогодишни затворски казни за девет каталонски политичари и активисти, учесници во организирањето на референдумот и прогласувањето на независноста на овој североисточен регион, јави локалниот весник „Ла Вангвардија”.
Според весникот, луѓе се собираат на некои од клучните локации во каталонскиот главен град, меѓу кои и пред зградата на локалната власт и високиот судски орган во регионот.
Зајакнато е и полициското присуство во градот.
Поранешниот лидер на регионалната каталонска влада Карлес Пуџдемон претходно ја нарече „свирепа” пресудата на Врховниот суд на Шпанија со која деветмина каталонски лидери се осудени на затворски казни.
„Време е за реакција….. за иднината на нашите синови и ќерки. За демократијата. За Европа. За Каталонија”, напиша Пуџдемон на Твитер.
Пуџдемон го водеше овој шпански регион во време кога имаше обид за прогласување независност во 2017 година, за кое и им се судеше на каталонските лидери, пренесуваат британските медиуми.
Медиумите потсетуваат дека нему не му се суди бидејќи побегнал во Белгија, каде живее во егзил.
Шпанскиот Врховен суд денеска осуди девет поранешни каталонски политичари и активисти за човекови права на казни од девет до 13 години затвор заради нивната улога во неуспешното прогласување на независноста на Каталонија во 2017 година.
Тројца други обвинети се прогласени за виновни само за непослушност и не добија затворски казни, пренесоа британските медиуми.
Поранешниот претседател на каталонската Влада Ориол Хонкурес е осуден на 13 години затвор заради бунт и злоупотреба на јавните фондови, наведуваат американските медиуми.
