Град Скопје денес ја урна пералната која се наоѓаше буквално сред булеварот Трета македонска бригада во Општина Аеродром. Од Градот велат дека по добиениот судски спор за овој проблем кој го наследиле од минатото раководство, денеска конечно е урната пералната.
„Наскоро ќе почнеме со пробивање и на овој дел од булеварот“, велат од Град Скопје.
Откако улицата беше проширена во булевар пред 3,5 години, пресечена е со времен објект, автоперална. Ексградоначалникот Коце Трајановски при пуштањето на булеварот кажа дека за објектот имало постапка за експропријација и затоа не можеле да ја урнат пералната, па булеварот во еден дел наместо две има една коловозна лента.
