Опозицискиот белградски весник „Данас” во денешната анализа на посетата на рускиот премиер Дмитриј Медведев на Белград, оценува дека таа е уште еден обид на одвојување на Србија од евроинтегративните процеси, преку зацврстување на сојузот со Руската федерација. Според политикологот Борис Варга, посетата на рускиот премиер се совпаѓа со најголемата криза во регионот од Охридскиот мировен договор во 2001 година. ЕУ, на последниот состанок на шефовите на држави и влади, всушност го потврди веќе постојното сомневање дека проширувањето е привремено стопирано, а Северна Македонија и Албанија се првите жртви на таа политика.
– Геополитичките околности на Западен Балкан во моментов се многу поволни за Москва, а на Русија и се отвора простор каде лесно може добро да се позиционира во однос на ЕУ и САД. ЕУ отсекогаш била инертна во решавањето на проблемите на Западен Балкан, така што се очекува САД да извршат силен политички притисок Србија да го признае Косово, за што говори назначување на дури двајца американски претставници за забрзување на решавањето на проблемот, вели соговорникот на Данас.
После двата клучни ордени за една година на Александар Вучиќ – Александар Невски и Свети Сава, посочува Борис Варга, Русите можат да бидат сигурни дека претседателот на Србија нема да ги исполни ветувањата дадени на Западот и да ја признае независноста на Косово, а најверојатно нема ни да оди на поделба.
– На Москва најмногу и одговара постојниот статус кво утврден со резолуцијата 1244, бидејќи и гарантира долгогодишно присуство на Балканот, како заштитник на Србија. Српското општество е веќе длабоко поделено, а опозицијата е повеќе евроскептична од властите, а во некои случаи и русофилна. За прв пат во српската транзиција, имаме ситуација Русите во Србија да ги контролираат и власта и опозицијата, вели Варга.
Тој заклучува дека Медведев не донел ништо ново во Белград, туку само потврдил дека Русија и нуди на Србија алтернатива на ЕУ во форма на поголемо приближување на пазарот преку пристапување во Евроазискиот економски сојуз.
Според генералниот секретар на Лигата на социјалдемократите на Војводина (ЛСВ), Бојан Костреш, „официјалниот Белград и Москва забораваат дека не може да се рехабилитира национализмот и фашизмот во 90-тите, де се глорифицираат воените злосторници од тој период и да се повикува на антифашизам. Антифашизмот не се огледа само во односот во Втората светска војна, туку и во односот кон трагичните југословенски војни и злосторства од 90-тите”.
Костреш посочува дека економскиот аспект на посетата е исто толку неубедлив како и воената парада, која единствено може да послужи само за покажување „заби” на соседите. Тој потсетува дека ЕУ е главниот економски партнер со 61 процент од вкупната економска размена во 2018 година и донатор во Србија, кој досега има инвестирано 3,7 милијарди евра неповратни средства, а Русија во Србија нема сериозни инвестиции и исклучиво ги користи енергентите за брутална експлоатација.
