Полската владејчка партија Право и правда побара повторно броење на гласовите во шест окрузи за кандидатите за Сенат, откако го изгуби мнозинството во тоа тело на неодамнешните избори.
Портпаролот на партијата, Радослав Фогиел соопшти дека партијата го користи своето право на пребројување на гласовите во окрузите каде гласањето било тесно и каде имало многу неважечки ливчиња. Тој ги негираше тврдењата на опозицијата дека Право и правда сака да ги сврти резултатите од изборите одржани на 13 октомври.
Гжегож Шетина, лидер на опозициската Граѓанска платформа, барањето го оквалификува како „голем скандал” и рече дека не може да биде уверен дека пребројувањето ќе се изведе на транспарентен начин.
