По повод одбележувањето на Европскиот ден на правдата, Адвокатската комора на Република Северна Македонија утре во Апелацискиот суд Скопје од 10:00 до 14:00 часот, организира отворен ден, при што граѓаните на средби со адвокати ќе можат да се информираат за своите основни права во повеќе области.
-Европски ден на правдата – 25 октомври, секоја година се одбележува во сите држави во Европа. Целта за негово одбележување е во сите европски држави, правдата да се доближи до граѓаните и тие да бидат запознаени со нејзиното спроведување. Интенцијата за одбележувањето на Европскиот ден на правдата е на граѓаните во Европа да им се овозможи одблизу да бидат запознаени со нивните основни права во повеќе области како семејно право, право на сопственост, наследување, договорно право, авторско право и слично, се наведува во соопштението од Адвокатската комора.
Иницијативата за одбележување на овој ден потекнува од Европската комисија и од Советот на Европа кои широко го поддржуваат организирањето на активностите во сите европски држави. Овој ден посебно се одбележува со организирање на отворени денови во судовите, средби на адвокатите, судии, медијаторите, нотарите со граѓаните, давање на информации и совети на граѓаните, симулации на судење, организирање на локални конференции и сл.
