Кој е Влатко Андоновски – Шате, новиот селектор на женската фудбалска репрезентација на САД. Голема чест за македонскиот 43-годишен фудбалски стартег да ја предводи селекцијата на актуелниот светски првак. Селекцијата на САД во женски фудбал е тоа што е Бразил за машкиот. Има четири светски и четири олимписки титули. На Мундијалите, од 1991 година Американките никогаш не останале без медал, а на Летните Олимписки игри таа серија ја прекинаа лани во Рио каде беа елиминирани во четвртфиналето.
Новиот селектор на женската фудбалска репрезентација на САД, Андоновски е предодреден да освојува титули и признанија за најуспешен. Како тренер на тимот на Сиетл Реин, годинава вторпат е избран за најдобар тренер во женската МЛС-лига, каде има освоено две шампионски титули, а најголемиот дел од фудбалерките го потенцираа неговото име дека е најдобриот избор за селектор.
Андоновски во САД пристигна во 2000 година. Во Македонија играше голем фудбал и настапуваше за Вардар од чија младинска школа потекнува, а го носеше дресот на Македонија ЃП, Цементарница, Работнички. Прво потпиша за Вичита Вингс во Националната професионална фудбалска лига (НПСЛ), а потоа играше и за Канзас сити кометс, Калифорнија Кугарс, како и за Филаделфија Кикс во американската футсал лига. Како футсалец во САД, Андоновски има два настапи на ол-стар, една награда за најдобар играч во 2005 година, дефанзивец на годината во 2002, играч со најголем напредок во 2002. Кога ја заврши играчката кариера, Андоновски почна со работа со млади тимови низ регионот на Канзас, вклучувајќи и елитни клубови од националната лига и тимови од женски развојни академии. Освои четири државни првенства на Мисури, младинска титула во националниот шампионат, а беше прв тренер и на девојчињата од развојниот програм на Мисури. Пред седум години, тој стана помошник во Канзас сити кометс, кои играа во најсилната футсал лига на САД и по три години, беше наименуван како прв тренер, па во 2013-14 година стигна и до шампионската титула на САД.
Интересно за фудбалските достигнувања на Андоновски е и тоа што држи рекорд во женскиот фудбал во САД, затоа што со Канзас сити имал серија од 10 меча без пораз, што ниту еден друг тим во лигата досега не успеал да го достигне.
