На Европскиот совет не беше кажано „не” за да почнете процес на преговори, туку дека ова прашање повторно ќе биде ставено на разгледување. Треба да и објасниме на јавноста дека не се работи за „не”, ниту за историска грешка. Јас претпочитам да кажам дека се работи за еден историски застој, за да се навратиме пак и овој процес на преговори да почне што е можно побрзо. Имаме заедничка иднина, да ја напишеме заедно.
Ова беа клучните пораки кои претседателот на Европскиот Парламент Давид Сасоли ги упати денеска пред пратениците, високиот државен врв, лидерите на верските заедници и претставниците на дипломатскиот кор, во своето обраќање во Собранието на Северна Македонија.
– Голема чест за мене претставува тоа што денеска сум пред ова Собрание, за време на мојата прва посета на држава надвор од Европската Унија. Тука сум да ви кажам дека вашите разочарувања ги споделуваме, тие се и наши, бидејќи сме убедени дека имаме заедничка иднина, а таа иднина се нарекува Европска Унија, рече Сасоли.
Посочи дека постојат одредени тешкотии што треба да ги надминеме, но треба да гледаме со малку оптимизам што, како што рече, ќе ни овозможи да ја завршиме и оваа фаза што ќе и овозможи на Северна Македонија да ги почне преговорите за членство во ЕУ.
– Направивте голем напор дури и го сменивте уставното име, но немојте да жалите поради тоа. Тоа беше многу важна работа со која треба да се гордеете и што треба да ја покаже вашата храброст, и што ќе ви овозможи не само да барате преговори и членство, туку и да пристапите кон евроатлантските сојузи и тие два момента ќе бидат многу важни за вашата иднина. Ова е одлучувачки чекор што им покажа на европските иституции дека сте подготвени за заеднички пат со нас. Тоа е сигнал што треба да го пренесете на јавното мислење и сакам да заблагодарам во оваа сала, до медиумите, бидејќи видов толкава страст како Брисел така и овде во овие два дена, дека не смееме да застанеме и сите да се заложиме. Забелешките што беа кажани од малку држави сигурен сум дека ќе успееме дефинитивно да ги замолкнеме и да ги расчистиме проблемите што се појавија, подвлече Сасоли.
Рече дека вчера на средбата со премиерот Зоран Заев била истакната потребата да бидеме уверени дека блокадата што се случи во Брисел е еден мал застој, еден преоден момент во кој, како што рече, почувствувавме дека околу Северна Македонија постои големо внимание, дека постојат одреден број земји, влади, европски институции, Европскиот Парламент, Европската Комисија, Европскиот совет, кои се убедени дека процесот на преговори треба да почне што е можно поскоро.
Изрази увереност дека резервите искажани од одредени земји наскоро ќе бидат преразгледани, а разочарувањата што нивните резерви ги предизвикаа во Северна Македонија и Албанија треба да бидат надминати со храброст, бидејќи треба подобро да се дефинира просторот на ЕУ.
– Западниот Балкан е во тој простор. Имаме заедничка историја, традиција, заеднички чувства. Тоа природно ќе биде нашата сила и нашето наследство што ќе го оставиме на младите во Северна Македонија кои природно гледаат на процесот на пристапување на оваа земја во Унијата, рече Сасоли.
Свесни сме и убедени, кажа Сасоли, дека Северна Македонија треба побрзо да го почне и да го заврши процесот на пристапување кон ЕУ.
– Се разбира сфаќаме дека и ЕУ треба да го направи својот дел од работата и земјите кои се заинтересирани за влез да продолжат по својот пат. Преговорите ќе бидат момент што само ќе го зајакне процесот на реформи, за кои Северна Македонија има потреба да ги заврши. Утрово ми остави голем впечаток состанокот со политичките партии во Парламентот и сфатив дека во плурализмот на мислењата слушнав едно заедништво, еден заедничко чувство за процесот на преговори да почне. Да слушнам од нив дека Европа е нивната иднина, тоа е позитивен сигнал и да им кажеме дека овој пат повторно ќе продолжи и затоа имаме потреба од вас од вашиот ентузијазам, од вашата желба за слобода и демократија, за учество во создавањето на иднината на ЕУ, посочи Сасоли и додаде оти тоа без Балканот нема да биде возможно.
За средбата со младите вчера, вели дека му оставила голем впечаток, бидејќи тие се истите млади кои ги среќава во европските држави. – Тие имаат исти чувства, иста визија, иста страст и ист бес затоа што би сакале да живеат во поправеден свет. Ова е нашата голема резерва од која ќе црпиме сила и да им објасниме на младите дека она што се случи во Европскиот совет нема да го запре ова движење и овој процес. Да им го кажеме тоа дека овој пат ќе ја доведе Северна Македонија во процесот на пристапни преговори, тоа е пишано, тоа е наша заедничка иднина, подвлече Сасоли.
